صيدا سيتي

ألو مازن، شكلك بصيدا مصيّف عالبحر.

صح انا بصيدا، ومقيم دايماً، مش بس مصيّف.

أصلاً قالوا إنك بتعشق صيدا. بس بعدك عن العاصمة ما بيسببلك صعوبة خلال التصوير؟

انا بحب صيدا وأهل صيدا لأنهن طيبين كتير. بس كمان بعشق بيروت. صحيح اوقات بعتذر عن شغل بسبب بعدي عنها، بس انا قررت اسكن بصيدا كرمال الأهل. انا وحيد وما عندي أخوة، والعيلة عندي هي الاساس، لهيك ما بدي اتركن وحدن. الله يطوّل بعمر الوالدة، بس بعد عمر طويل ما بعرف إذا بنقل على بيروت أو لأ.
ع سيرة النقلة، قالوا إنك بلشت مسيرتك كعارض أزياء باستديو الفن 1996 وحصلت على الميدالية الذهبية. كيف نقلت على التمثيل؟

أنا من الأول كنت حب التمثيل، وحاولت كتير أدخل المجال ودقيت كتير بواب، بس اتسكروا بوجي. فترتها كان برنامج استديو الفن كتير محضور فقدّمت، وبعدو إجاني عروض كتير للتمثيل، فبلشت ببرنامج كوميدي ساخر «حلو الرواق» وعمل تاريخي مع نجدة انزور، وأول بطولة كانت مسلسل «البشاوات».

كمان قالوا انك درست ادارة الفنادق مش تمثيل.

انا بلشت تمثيل قبل الجامعة، وعملت دوبلاج واتعرفت على الصديق باسم مغنية. بوقتا كان الشغل بالفن مش كتير منيح، فنصحوني اعمل اختصاص تاني حتى يكون سلاح بايدي. اخترت ادارة الفنادق لأنو البلد كان بلّش يزبط ويعمر ويجي سوّاح.

إنت بتقول الممثل اللي مش دارس تمثيل، الموهبة والوسامة بيكفوه لينجح؟

اكيد لأ. الفنان لازم ينمّي موهبتو، والخبرة مهمة. بلبنان في كتير قصص تانية، نحنا ما منعرف نعملن، ولا منعرف نمسّح جوخ ولا نساير. الله عاطيني موهبة وعندي خبرة واخلاق والتزام، وهول اللي بقدر اعطيهن.
قالوا كمان انو الممثل اللبناني مش مطلوب عربياً بأدوار أولى. إنت شو بتقول؟

أنا بقول لازم الممثل اللبناني يتسوّق أكتر. اليوم اذا بينعطى دور حلو، ومش ضروري دور أول، ويأديه منيح، أكيد حيعلّم بالسوق العربي، وحينعرف أكتر وينطلب وبالإسم. لازم ينعطى فرص أكتر حتى يبرز ويفرجي قديش هو موهوب.

قالوا انك بتحب العيلة والاستقرار. في حدا من اولادك عندو موهبة التمثيل؟ وممكن تشجعو بهالظروف على الفن؟
خليل الكبير لأ، حتى صور ما بيحب يتصوّر، بينما نانا وميرڤا كتير بيحبو يصوّروا قصص برايفت، واحياناً بينزلوهن على تيك توك. أنا لا بشجّع ولا ما بشجّع. أولادي بعدن صغار وإذا إختاروا يدخلوا عالم الفن، أكيد رح كون حدّن وادعمن.

المصدر | جوزيفين حبشي - نداء الوطن
الرابط | https://tinyurl.com/3bc5e97d